1993-ah Danish soft rock band MLTR-in 25 Minutes tih hla awmna album maktaduai chuang an hralh hma daih tawh khan, ka nau Rinkima leh keinite takngial pawh tiamin, khawvelah hian damlai lu sun hi maktaduai chuang an awm tawh ngei ang. Hmangaihna hi e, a natna tak hi a nawmna zu nia! Nawmna ai hian natna hian mihring min luangrualtir tam zawk. Ka nau lungrualpui hi ka zak lem lo!
Dawn chiang lova lungrualpui ngah luat erawh zawng a khawlh khawp. Thuziak chhuahsak tura tiam ka lo ngah lu deuh a, kan thlabi huang, Hringnun, Hriselna leh Sekrek chenin kan nek ral ta. Kan heti fo lovang.

‘Min’ chhiartute chuan, Mus-a thuziakah hian ka inrawlh lova, Rinkima thuziakah hian ka inrawlh tih in hre leh tho pek ang. Mahse Ramdini Pa (Pu Sangliana) Ruai Manual(!)-ah hi chuan ka inrawlh miah lo. Ka fatu ve ngai lova, a taka rawn zui tlak ka ni hlawl lo. Hriat belh duh nei chuan 9436153731-ah a ziaktupa hi in zawt dawn nia.

Sapram kal ta lo, Lalchhuanmawia hi in hre kher lo vang. A hming bula ‘Doctor’ tih a dah duh loh danah leh, a sapram kal tum chanchin ringawt pawh heti khawpa a ngap danah hian, hmelhriat aiin hmelhriat loh hi a him zawk mai thei. He thuziak chimawm takah pawh hian inhnamhnawihna ka nei lo tih ka puang e!

Thianzaho chaw eikhawmnaah Nibiru kan sawi a. Kan zinga pakhat chuan planet phenah arsi biru a awm ang a, a hmingah Mizo tawngin Ni-biru tiin an ziak emaw a lo ti ve char char. Ka engineer thianteho hi chuan, Nibiru Planetin khawvel a tihchhiat fe hnuah pawh -  la hre ve dawn hek lo - World Bank kawngah phur takin alkatra an la chhuang khu luih luihin ka ring!