Nikhua a rei leh ta. In meuha min zawng chhuakin min rawn tlawh a. Chutiang tlangval pangngai, sa pan leh zakzum ve tak chu, a rawn hruaitu chuan “Hei Mama a nia,” ti lo se, in luah tur zawng zirlai emaw ka ti mai awm e. Kan inchibai a, a nui var var a, zangkhai takin hringnun kan sawi dun a. Lunglen vang leh vawksa zankhat rep thlakhlelh vang mai mai hian Pathianin kan kawng tura a ruat hi tlawmsan theih a nih thute kan sawi a. “Bengali tawng thiam la, Bengali pa challang tak pakhat tal, pazawn nei ang che,” te ka ti a. Thalai pawl inkhawma thu sawi tura an sawm thu min hrilh a. “Sawi thiam tum reng reng suh. I sawi nalh lohin zak bawk suh. Sawi tura siam i ni lo, pet goal tura siam i ni!” te ka ti ta nekin ka hria.

A hnuah, a hlawh zat ka lo hria a, mahse, zep tura ngen ka ni. Ni khat chu Zonet office-in Tetea phone kan dawng a, “Mama’n in a sa e! Amah ngeiin cement a chawk mek, a thla rawn la rawh u!” tih a ni. Thla la turin kan intir nghal a. Football khelh hlawha chhungkua chawma in sa thei hmasa ber chuan, ama kut ngeia cement chawkin ban a phun a ni. Kei ka hringnun khawvelah chuan, hei aia ‘news’ ngaihnawm hi a awm thei chuang lo.

Vawiinah Lz office-ah Hmingsanga a lo lut a, Mama chuan kum khata nuai sawmhnihin contract a sign thu min rawn hrilh ta. Kei sumdawng hian football ka hre lo, thahruia nuai 20 thawhchhuah harzia zawk hi ka hria. He kum sawmli chhung hian, thla khatah nuai 1.6 ka thawh chhuah pawh ka la hre lo. Ka sum hmuh ve chhun pawh ka Mizopuite ipte atanga ka dawn a ni. Mama chuan Mizoram budget tihek miah lovin 2009-ah hian nuai 20 a hlawh dawn a ni. Kolkata ka tlawh apiangin, mi cheng mtd 7.78 zinga pakhat Mama vangin Mizo nih hi nuam ka ti thin.

“Hei, thang kan chhuah zu ni ber a! Mizo tlangval inkhel thiamte contract sign chungchang chu i chhuah teh ang,” tiin Hmingsanga ka ngen a. Chhuang tak chungin, kan tlangval thlangtlate sa lu hawn zat kan chhiar dawn a ni.

Lengzem chuan heng kan tlangvalte hi kan chhuang a, an inpekna leh an chhelna te kan chawimawi a, zah takin chibai kan buk e. He thla chhuak hi an pual lo ni rawh se.